تتعلم هنا مقامات جديدة متفرعة عن مقام الحجاز مثل مقام الشهناز و الحجاز التركي و مقام الزنجران.
ريبال خضري:
"مرحبا، أنا ريبال من إعزف دوت كوم.
من المقامات كمان الفرعيه اللي بتمرق عنا على هادا الـ من مقام الحجاز هو مقام الشهناز، مقام الشهناز هو نسخه حقيقيه من حجاز كار ولكن على الراي، يعني كإني عم بقول حجاز و عم برفع سابعته، عم برفع الدو خليها دو شارب، تمام، أنا كنت بالدو بالحجاز كار (يقرأ الأستاذ ريبال التمرين قراءة ايقاعية).
هلأ كإني أنا بس عم بعمل تصوير من الراي (يقرأ الأستاذ ريبال التمرين قراءة ايقاعية)، و في كتير أغاني أو مقاطع من أغاني أم كلثوم بتروح باتجاه مقام المقام الشهناز، آخر مقام أو لسا في عنا مقامين، في عنا مقام نحنا لما بيكون عنا الجنس الأدنى حجاز و بعدل جنسي الأعلى صول بدل ما أخليه نهاوند صول بخليه رست صول، هادا المقام بنسميه عادةً حجاز تركي، يعني (يقرأ الأستاذ ريبال التمرين قراءة ايقاعية)، اللي هي السي نص بي مول (يقرأ الأستاذ ريبال التمرين قراءة ايقاعية).
أنا فيني أرجع عالسي نص بي مول نفسها فيني أخليها سي بي مول، متل لما أنا (يعزف الأستاذ ريبال التمرين)، متل لما أنا ببتدي بقبضك المياس (يقرأ الأستاذ ريبال التمرين قراءة ايقاعية)، أنا ابتديت برست الصول (يقرأ الأستاذ ريبال التمرين قراءة ايقاعية)، بلشت إرجع على الحجاز (يقرأ الأستاذ ريبال التمرين قراءة ايقاعية)، هاد حجاز التركي، آخر مقام و هو من المقامات اللي يعد مقام كتير صعب هو مقام الزنجران، مقام الزنجران هو مقام حتى إستماعه صعب، اللي هو أنا شو راح أعمل، أنا راح يكون عندي جنس الحجاز بس أنا الجنس الأعلى حبدله لجنس عجم، يعني حيصير المقام بهادا الشكل (يقرأ الأستاذ ريبال التمرين قراءة ايقاعية). تمام.
هلأ هادا المقام من المقامات اللي كتير يستخدم بالأدعيه و الإبتهالات الدينيه، راح نلاقي موال لعبد الوهاب جداً مشهور إسمه الموال أمانه يا ليل تقول للفجر يستنا، من أكثر المواويل صعوبةً بالغناء العربي، عادةً هادا الموال يبتدئ بجنس العجم الأعلى لحتى يرجع للحجاز مش بالعكس، يعني (يقرأ الأستاذ ريبال التمرين قراءة ايقاعية)، لحديت الآن حجاز هلأ (يقرأ الأستاذ ريبال التمرين قراءة ايقاعية).
طبعاً هادا المقام في كتير نظريات عليه بس نحنا ما راح نغوص عميقاً بهادا المقام، في نظريات بتقول إن أنا ممكن يكون فيه رست ممكن يكون فيه بيات بس نحنا حنحكي عن الزبده الأساسيه للمقام، نحنا عم بنحكي عن حجاز راي مع عجم صول، هادا بالنسبه للمقامات المتفرعه عن مقام الحجاز، بيصفى عندكن إنتوا إن اتدوروا على أغاني من مقام الحجاز حتلاقوا كتير أغاني لمحمد عبده، حتلاقوا أغاني للسيده أم كلثوم، حتلاقوا أغاني لعبد الحليم، لكارم محمود، راح تلاقوا أغاني كتير منتشره على مقام الحجاز، بتمنى يكون مقام الحجاز سهل عليكم، قدرتوا تستوعبوه أكتر، الدروس القادمه حنبتدي بمقامات تانيه لحتى نكون بكورس الغناء اللي نحنا هلأ عم بنقدمه.
إنتهينا أو أخدنا فكره واسعه عن كل المقامات، باي."